be elsewhere.

تواصل معنا

ازاي تلاقي فرصة شغل خارج مصر؟ معلومات سريعة!

NotTrees  ●  الأحد ٢٤ يوليو ٢٠١٦ ◷ ١٢:٤٥ ص
ازاي تلاقي فرصة شغل خارج مصر؟ معلومات سريعة!

واحدة من أسهل الطرق -نسبياً- للهجرة خارج مصر هي أنك تلاقي وظيفة في شركة مستعدة تعملك استقدام (Sponsorship). أصحاب المهارة في مجالات زي مطوري البرمجيات والمصممين والأطباء والمهندسين والمحاسبين، وغيرهم، مطلوبين بكثرة في جميع دول العالم!

يعني ايه استقدام؟

عشان شركة تقدر تشغل موظفين من خارج الدولة اللي هيا فيها، في الأغلب الشركة دي بتحتاج تصريح من الحكومة الأول. الإجراءات والشروط بتختلف بشكل كبير بين الدول، لكن في الغالب بيتفقوا في متطلب واحد وهو أن الشركة تثبت أنها ملقتش حد مناسب للوظيفة متقدم من داخل البلد وبالتالي عايزين يستقدموا حد من خارجها.

الشركات المستعدة لاستقدام الموظفين من الخارج يعني أنهم مستعدين يمشوا في الاجراءات الحكومية دي ويثبتوا أنك الشخص الأنسب للوظيفة عشان الدولة تديلك تصريح للعمل والإقامة فيها. بالمناسبة، الاستقدام لا يعني بالضرورة تحمل تكاليف سفر الموظف، نادراً ما فيه شركة بتعمل كده دلوقتي. مصاريف تصريح العمل هي بس اللي بتبقى على الشركة.

إزاي أبقى الشخص الأنسب للوظيفة؟

أكيد عشان تبقى الشخص المناسب أنك تكون عديت المقابلات الشخصية بنجاح. وده بالتالي يتطلب أنك تبقى متميز في مجال العمل اللي انت بتقدم فيه. من المهم جداً أنك تفضل تطور من نفسك ومن خبراتك مهما كان مجال عملك، لأنك لو زي اللي حواليك يبقى ايه الميزة اللي هتضيفها للمكان اللي هتروحه وتخليهم يختاروك بدلاً عن الناس اللي عندهم؟

طبعا في حاجات أكتر ممكن تعملها تخليك متميز عن كل اللي بيقدموا في نفس الوظيفة معاك، ده هنناقشه في مقالات مستقلة.

هل محتاج أتعلم لغة الدولة اللي عايز أشتغل فيها؟

مش شرط. بالنسبة لمتطلبات اللغة فهي بتختلف حسب طبيعة ومتطلبات الوظيفة. كمثال، لو شركة في ألمانيا بتدور على مبرمجين، غالباً اللغة مش هتكون شرط أساسي. على الناحية التانية لو مستشفى في الدنمارك محتاجة أطباء أو ممرضين، اللغة في الأغلب هتبقى مطلوبة وأساسية.

ازاي تعرف لغة الدولة مطلوبة للوظيفة أو لا؟

  • لغة الإعلان عن الوظيفة: لو اللغة متطلب أساسي هيبقى الإعلان بنفس اللغة دي. كمثال لو الإعلان بالألماني وأنت متعرفش ألماني يبقى بلاش تقدم.

  • إعلان الوظيفة موضح متطلبات اللغة: أغلب إعلانات الوظائف بيبقى مكتوب فيها اللغات المطلوبة وهل هي أساسية أو اختيارية.

لو مش متأكد، ابعت إيميل أو اتصل بالشركة واسأل عن متطلبات اللغة للوظيفة اللي عايز تقدملها. وكنصيحة عامة، من المهم عمليا تعلم لغة الدولة اللي هتعيش فيها حتى لو كل المعاملات في العمل تتم من خلال اللغة الإنجليزية أو العربية. وبرضه بتبقى نقطة كويسة في الأبلكيشن بتاعك لما تعرف الشركة أنك عندك النية لتعلم اللغة إذا اختاروك للوظيفة، أو بدأت تتعلمها فعلاً (لو اللغة المحلية مش مطلوبة).

كلام جميل، فين بقى إعلانات الوظائف دي؟

قيه كذا طريقة فعالة للبحث أو إيجاد وظائف خارج مصر:

  • مواقع البحث عن الوظائف: ودي بتنقسم لـ 3 أقسام:
  • مواقع رسمية حكومية: الدول بتعملها عشان تستقطب المتميزين يشتغلوا عندهم. مثلاً
    Make it in Germany، Working in Sweden، Work in Denmark و Canada Job Bank

  • المواقع الالكترونية للشركات: لو فيه شركة معينة عايز تشتغل فيها، ادخل موقعهم ودور في قسم الوظائف على وظيفة مناسبة ليك. مش كل الشركات بتعمل إعلانات على مواقع الوظائف على فكرة.

  • شركات التوظيف ومساعدي التوظيف المستقلين: فيه شركات عالمية للتوظيف زي Robert Half أو شركات أصغر محلية في كل دولة ممكن تتصل بيهم أو تبعتلهم تتكلم معاهم وتسأل لو عندهم شغل مناسب ليك، غالبا بيقدموا خدماتهم مجانًا (لأنهم بيكسبوا من الشركات) أو لقاء مبلغ معين ممكن يبقى شهري أو عند الحصول على الوظيفة. استخدم جوجل أو دور عليهم على LinkedIn عشان تلاقيهم (لو بروفايلك حلو هناك هما اللي هيبعتولك!)

  • وطبعا: جوجل!

نصائح سريعة تفيدك عند البحث

  • حاول وانت بتدور على وظيفة تستخدم كلمات دقيقة في تخصصك بدل الكلمات العامة. كمثال، لو انت مطور مواقع ممكن تدور على JavaScript بدل developer.

  • صدق أو لا تصدق: اللغة العربية مطلوبة في دول كثيرة لا تتحدث العربية. لو دورت كتير على شغل وملقتش حاجة مناسبة، جرب تستخدم Arabic ككلمة مفتاحية في بحثك لو عايز تشوف نتائج ممكن متكونش شفتها قبل كده.

  • بعض المواقع المذكورة أعلاه بتخليك تختار إذا كنت عايز تظهر فقط الشركات اللي عندها النية انها تعملك استقدام، ده فلتر كويس ومفيد، لكن برضه ممكن تجرب تبحث من غيره لو واثق من قدرتك على اقناع شركة أنها تستقدمك بسبب تميزك حتى لو ده مكانش في خططهم.

كلمة مهمة

البحث والحصول على وظيفة خارج مصر للمتميزين عملية ممكن تستغرق شهور، أو حتى سنوات (ومن الممكن أيضا ان تستغرق ساعات أو أيام!). الهدف هو إعداد مستندات التقديم بعناية واهتمام بالتفاصيل، تقديم نفسك بشكل متميز، تخصيص وقت كافي يوميا للبحث والتقديم بدون ملل، والثقة بالحصول على وظيفة أحلامك في النهاية سواءاً طال وقت الانتظار أو قصر. في الغالب لو أنت متميز في شغلك عملية الاختيار ملهاش علاقة بقدرتك على قد ما تعتمد على سهولة أو صعوبة عملية الاستقدام بالنسبة للشركة مقارنة بمنافسيك على نفس الوظيفة.

في المقالات القادمة هنتكلم بشكل أوسع عن كل المعلومات اللي ممكن تفيدك في عملية التقديم. خليك متابعنا! ولو عندك سؤال عام عن عملية البحث عن وظيفة خارج مصر، اكتب سؤالك في التعليقات وهنرد عليه في أقرب فرصة!


التعليقات

اقرأ أيضاًكل المقالات