be elsewhere.

تواصل معنا

كل اللي محتاج تعرفه عن المنح الدراسية المقدمة للمصريين حول العالم

NotTrees  ●  الأربعاء ٣ أغسطس ٢٠١٦ ◷ ٩:٣٥ ص
كل اللي محتاج تعرفه عن المنح الدراسية المقدمة للمصريين حول العالم

السفر بغرض الدراسة من أحسن القرارات اللي ممكن تاخدها لمستقبلك! مش بس هتتعلم حاجات جديدة تزود من معرفتك الأكاديمية، كمان هتكتسب مهارات صعب تتعلمها بأي طريقة تانية. الدراسة خارج مصر بتخليك تحتك بثقافات وخبرات مختلفة كلها هتساعدك في تطوير شخصيتك وصقل مواهبك وقدراتك، كمان زيادة فرصك المهنية وفرص السفر والهجرة المستقبلية.

أنواع فرص الدراسة خارج مصر

بشكل عام، فرص الدراسة خارج مصر -باختلاف مراحلها سواءً دراسة جامعية أو دراسات عليا- يمكن تقسيمها لنوعين:

  • المنح الدراسية: وده النوع اللي هنتكلم عنه في المقالة دي.

  • الدراسة على نفقتك الخاصة: ودي ببساطة بتتم عن طريق إنك تحدد الجامعة اللي عايز تدرس فيها، وتقدم طلب التحاق مباشر فيها بعدما تستوفي كل شروطها. طبعا الشروط والتكلفة بتختلف بشكل كبير بين جامعة والتانية، وبين مجال والتاني، في الغالب الشروط دي بيكون من ضمنها معادلة شهادات سابقة ليك، وبيان درجات لمواد معينة لها علاقة بتخصص الدراسة، واثبات مستوى معين في اللغة الأجنبية. بالإضافة إلى تقديم ما يفيد مقدرتك على دفع المصاريف الدراسية ومصاريف السكن والمعيشة بالكامل طوال مدة الدراسة.

    النوع ده مش هنتكلم عنه هنا لأن الاختيارات فيه غير محدودة وبتعتمد على اختيارك الشخصي بالبحث واختيار الجامعة المناسبة لتخصص دراستك وقدرتك المالية.

المنح الدراسية وأنواعها

المنح الدراسية هي تعهد من جهة أو مؤسسة (ممكن تكون حكومية أو خاصة) أو شخص، بتحمل كل أو جزء من تكاليف الدراسة والمعيشة للطالب الحاصل على المنحة طوال مدة الدراسة.

الجهات المانحة بتقدم المنح دي لأسباب مختلفة، منها:

  • لو الجهة حكومية فغالبا لأن المنح دي بتخدم توجه الحكومة العام، أو بتستقطب المتميزين من خارج الدولة عشان يدرسوا فيها ويفيدوها بعلمهم وخبراتهم بعد كده

  • بعض الجامعات بتقدم منح دراسية للأجانب عشان تزود التنوع في جنسيات وثقافات الطلاب الدارسين فيها

  • بعض الشركات أو الأفراد بتقدم المنح الدراسية كجزء من مسؤوليتهم الاجتماعية تجاه مجتمهم

الشروط العامة للقبول في المنح الدراسية

عشان تنجح في الحصول على منحة دراسية، فيه شروط عامة بتشترك فيها جميع الفرص، بالإضافة طبعا إلى شروط خاصة لكل منحة. الشروط العامة دي زي:

  • تميز وتفوق شخصي و/أو دراسي

  • اثبات اتقان لغة الدراسة الأجنبية بشكل ممتاز (عن طريق اختبارات موحدة زي TOEFL للجامعات الأمريكية، أو IELTS للجامعات اللأوروبية)

  • الجنسية المصرية و/أو اللإقامة الحالية في مصر

  • التقدم للمنحة في خلال فترة التقديم المحددة

أشهر مقدمي برامج المنح الدراسية للطلبة المصريين

اسم الجهة المانحة الدولة مجالات الدراسة شرط سن المتقدم ملاحظات االتقديم
Fulbright الولايات المتحدة الأمريكية التدريس الجامعي، البحث العلمي، الدراسات الإسلامية، المهن الفنية والصناعية، الأعمال الإدارية، تكنولوجيا المعلومات، التعليم فى مرحلة الطفولة المبكرة، السياحة والفنادق، السلامة العامة، وغيرها لا يشترط السن في أغلب البرامج. برنامج واحد يتطلب أن يكون العمر من 25 إلى 30 سنة. من أشهر وأقدم مقدمي المنح الدراسية في مصر، راجع الموقع عشان تعرف تفاصيل وشروط المنح المتعددة. الموقع الرسمي
Chevening المملكة المتحدة مفتوحة، مع تشجيع خاص لـ Communication, Economics, Finance, Human rights, Journalism, Law, Media, Peace studies, Politics, Public policy, Sustainable development. لا يشترط سن معين من متطلبات البرنامج الحصول على شهادة جامعية من مصر، والخبرة العملية لمدة سنتين على الأقل في المجال المطلوب دراسته. راجع الموقع للشروط الكاملة. الموقع الرسمي
DAAD ألمانيا مجالات متعددة حسب البرنامج الموقع الرسمي
Sawiris Foundation الولايات المتحدة ألأمريكية، ألمانيا مجالات متعددة لا يشترط سن معين تغطية كاملة لتكاليف السفر والدراسة والمعيشة الموقع الرسمي
The Qalaa Holdings Scholarship Foundation الاختيار للطالب الاختيار للطالب السن لايزيد عن 35 سنة من متطلبات المنحة الخبرة العملية لمدة سنتين على الأقل في المجال المطلوب دراسته. راجع الموقع للشروط الكاملة. الموقع الرسمي

فرص اضافية ومصادر أخرى مفيدة

  • Exchange Opportunities, Embassy of the United States in Cairo: منح تعلن عنها السفارة الأمريكية بالقاهرة

  • Funding for US Study: قائمة موسعة بجميع المنح المقدمة في الجامعات الأمريكية والمتاحة للمصريين، يمكن البحث عن طريق مجال معين أو ولاية معينة

  • eduPASS: موقع يقدم معلومات مفيدة وروابط مهمة خاصة بالمنح والدراسة والحياة بشكل عام في الولايات المتحدة ألأمريكية

  • Scholarship Portal: قائمة بأكثر من ألف منحة دراسية في أوروبا وكندا وأستراليا وغيرها من دول العالم

  • بالإضافة إلى المواقع الرسمية للجامعات، ممكن تلاقي عليها كل المنح اللي الجامعة بتقدمها وشروطها وكيفية التقديم

نقاط مهمة بخصوص المنح الدراسية

  • اقرأ وصف وشروط المنحة بشكل دقيق، واتصل بمقدم المنحة واستفسر عن أي معلومات مش واضحة. لما تتأكد من انطباق شروط المنحة عليك قبل التقديم هيوفر وقتك ووقت المانح. كمان هيمنع أي مفاجآت مش سعيدة في مراحل الاختيار المتقدمة.

  • لو فاتك وقت التقديم المخصص لمنحة معينة، شوف ميعاد التقديم القادم هيكون امتى وسجله في برنامج التقويم على موبايلك واختار أن يتبعتلك تنبيه قبل الميعاد بكام يوم. في الأغلب شروط المنحة بتبقى ثابتة في كل مرة، فاستغل الفترة دي أنك تحاول تبقى جاهز لتحقيق كل الشروط لما ميعاد التقديم الجديد يجي. بشكل عام، كل ما قدمت بدري كل ما زادت فرص الحصول على المنحة.

  • أغلب المنح بتغطي تكاليف الدراسة والمعيشة للطالب فقط. لو عندك أسرة و/أو أطفال والمنحة مش هتغطي تكاليف سفرهم ومعيشتهم هتحتاج تأمن التكاليف دي من أموالك أو مدخراتك الشخصية.

  • لو قدرت توصل (عن طريق سؤال المانح مباشرة، أو مواقع التواصل الاجتماعي) لطالب قدم على المنحة دي قبل كده أو حصل عليها ممكن تسأله عن أي استفسارات ممكن تكون شاغلة بالك. بس خليك فاكر زي ما قلنا قبل كده إنك متخليش رأيه وتجربته الشخصية يأثر على قرارك، استخدم المعلومات كعامل مساعد فقط وليس عامل وحيد لأي قرار.

  • كتير بتحصل عمليات نصب باسم المنح الدراسية! استخدم ذكائك وخليك منطقي! اتأكد أنك بتتعامل مع جهات موثوق منها، وبتتعامل مع مواقعهم الرسمية وعناوين بريدهم الإلكتروني الرسمي. نادرا ما هتحتاج تدفع أي مبلغ لو المنحة شاملة، ولو دفعت عشان اختبار اللغة مثلا أو لأي سبب انت متأكد من أهميته، اتأكد انك بتدفع للجهة الصح ودايما اطلب إيصال بالدفع.

  • بعض المنح حتى الملتزمة بدفع تكاليف المعيشة مش بتكون مسؤولة عن البحث عن مكان مناسب وهتحتاج تدور على سكن بمعرفتك. في الحالة دي اتأكد من الجهات اللي بتتعامل معاها أنها جهات موثوقة ومش نصابة. اطلب النصيحة من مقدم المنحة أو صديق ساكن في الدولة اللي هتسافرلها عن أفضل الطرق لتأمين سكن مناسب قبل السفر لأن أكيد عندهم خبرة أكتر منك في الموضوع ده.

محتار بين السفر خارج مصر للدراسة وبين السفر للعمل والاستقرار؟

الموضوع محير فعلا بس تعالى نحاول نبسط الاختيار شوية :)

  • السفر بغرض الدراسة ممكن يبقى خطوة للعمل والاستقرار في الدولة اللي درست فيها. كتير من الدول مش بتعترف بالشهادات الجامعية المصرية، فلو شغلك بيعتمد على الشهادة الأكاديمية يبقى بسفرك للدراسة في الخارج هتزود فرصتك بشكل كبير جدا في الحصول على وظيفة في الدولة دي أو أي دولة أخرى لو إنت متميز. راجع شروط المنحة كويس لأن مش كل المنح بتديلك اختيار العمل بعد الدراسة.

  • لو مجال شغلك في الأغلب مش بيحتاج شهادة أكاديمية (زي مطوري المواقع الألكترونية مثلا)، وحاولت تدور على شغل خارج مصر من غير نتيجة وحابب تجرب حاجة مختلفة، ممكن تعتبر الدراسة في الخارج خطوة لتطوير نفسك علميا وذاتيا، وتقوية اللغة الأجنبية، وتجربة خبرة الحياة خارج مصر عموما. بعدها لما ترجع مصر هيبقى عندك خبرة أكتر وقدرة أكبر على السفر أو الهجرة في المستقبل.

المقالة هيتم تحديثها بشكل دوري، لو عايز تفضل متابع الجديد في موضوع المنح الدراسية المقدمة للمصرين تابع صفحتنا على فيسبوك أو تويتر. لو فيه منحة دراسية تعرفها ومش مذكورة في المقال أو المصادر، اكتبها مشكورا في تعليق وخلي الكل يستفيد!


التعليقات

اقرأ أيضاًكل المقالات