be elsewhere.

تواصل معنا

الرواتب خارج مصر: إجابات لأغلب أسئلتك!

NotTrees  ●  الأربعاء ١٠ أغسطس ٢٠١٦ ◷ ٣:١٤ م
الرواتب خارج مصر: إجابات لأغلب أسئلتك!

في حال نجاحك أنك تلاقي فرصة محتملة لعمل خارج مصر، هتمر بمرحلة تحديد الراتب الشهري، ودي ممكن تبتدي في شكل سؤال من الشركة ليك عن المرتب اللي انت عايزه/متوقعه، أو ممكن تبقى عرض مباشر بقيمة معينة. ازاي تعرف المرتب المناسب ليك في بلد عمرك ما زرتها أو عشت فيها؟ وازاي تتأكد من حصولك على أفضل راتب ممكن؟

عن الرواتب واختلافها بين دول العالم

فيه كذا نقطة مهمة حبينا نقولهم في الأول بشكل عام عن الرواتب:

  • العملة المحلية للدولة تختلف قيمتها الفعلية تماما خارجها، ومينفعش المقارنات بين العملات بدون حساب مستوى المعيشة في الدول المختلفة. كمثال بسيط، الحد التقريبي الأدنى للراتب الشهري في الولايات المتحدة الأمريكية هو 1,750 دولار أمريكي (والراتب ده بالكاد يكفي معيشة فرد واحد بدون رفاهيات هناك) لو ترجمناه بالسعر الرسمي للجنيه المصري يوم كتابة المقال هيبقى حوالي 28,000 جنيه (وده راتب يعتبر كويس جدا لأسرة في مصر). ممكن تكون القيمة البنكية واحدة لكن القيمة الفعلية مختلفة جدا.

  • الرواتب أحيانا تُعرض كمبلغ سنوي للتبسيط، لكنها في الواقع تُدفع بصورة شهرية.

  • الراتب المعروض ممكن يكون الصافي بعد خصم الضرائب (Net salary)، لكنه في الغالب بيبقى قبل خصم الضرائب أو (Gross salary). وده بيؤدي أن المبلغ الصافي يكون أقل. مهم جدا تخلي النقطة دي في بالك، ودايما اسأل الشركة لو مش متأكد.

  • لو الراتب المعروض يتكون من راتب أساسي +إضافات زي بدل سكن مثلا، في الغالب أي زيادات أو حوافز مستقبلية هتتحسب على الراتب الأساسي فقط.

  • الكاش مش كل حاجة :) في حاجات مادية تانية زي مثلا لو الشركة هتوفرلك سيارة أو تديلك ثمن انتقالك بالمواصلات العامة، فيه اشتراك الـGym أو كورس لتعلم اللغة المحلية، وغيرها من المميزات اللي ممكن تضاف للقيمة النهائية للراتب.
    فيه كمان مميزات مش مادية لكن ليها قيمة معنوية زي رغبتك في السفر والعيش في مكان جديد. أو كون السفر والوظيفة الجديدة مفيد ليك مهنيا أو نفسيا. أو ساعات العمل الأقل فيبقى عندك وقت أكبر تكون فيه مع أسرتك أو تمارس هواياتك. بص للـ"قيمة" بشكل عام.

السؤال الأشهر: ازاي أعرف الراتب المعروض كويس ولا لا؟ الشركة عرضت عليا مرتب (س)... هل ده كويس في دولة (ص)؟

في البداية مهم نشدد على أن الراتب "الكويس" مستحيل نقدر نلاقي معادلة تحدده، لأن فيه عوامل كتير جدا بتتداخل في التقييم أهمها خبرة وكفاءة الشخص، حجم الشركة وندرة التخصص، كمان من عوامل الاختلاف هيا عدد أفراد الأسرة وعدد العاملين فيها. طبعا غير توقعات الشخص نفسه وعاداته ونمط حياته وتعريفه لخواص الراتب الجيد.

للأسباب دي، هنقول طرق عامة جدأ لا تعني بالضرورة تطبيقها حرفيا، لكن ممكن تبقى نقطة بداية كويسة لتقييمك الشخصي:

  • فيه مواقع متخصصة بعرض المرتبات المتوسطة لمهن مختلفة حول العالم، زي Glassdoor و PayScale ممكن تحاول تدور على تخصصك هناك وتشوف متوسط المرتبات ايه.

  • غالبا عند انتقالك لمكان جديد، أكبر تكلفة هتتكلفها بصورة ثابتة شهريا هي إيجار السكن (سواءا بيت أو شقة أو غرفة في سكن مشترك). ممكن تبتدي تعمل بحث في المواقع المختصة بعرض المساكن المتاحة للإيجار في المدينة اللي هتسافر ليها (ودي سهل تلاقيها من جوجل أو بطلب المساعدة من الشركة)، وتشوف متوسط الإيجار اللي انت هتدفعه كام لمسكن بمواصفات تناسبك. صافي المرتب من المفضل أنه لا يقل عن ثلاثة أضعاف مبلغ الإيجار ده، أو ضعفين كحد أدنى للراتب المقبول.

  • فيه موقع مفيد اسمه Numbeo بتختار فيه مدينة معينة، ويجيبلك أسعار مختلفة لحاجات زي الإيجارات والمواصلات والمطاعم واشتراك الموبايل والإنترنت وحتى الحاجات اللي ممكن تشتريها من السوبر ماركت وحاجات كتير تانية. الأسعار دي كتبها ناس كتير عايشين في المكان ده. وبكده ممكن بحسابات تقريبية تعرف تكلفة المعيشة الشهرية ونشوف هل المرتب المعروض مناسب ولا لا.

  • اسأل أصدقاء أو معارف ليك عايشين في نفس البلد أو عاشوا فيها فترة (أو في دول قريبة منها) عن رأيهم في نوعية المرتبات اللي تعتبر جيدة. طبعا من غير احراج ليهم أو ليك بطلب أرقام دقيقة تخص مرتباتهم.

الشركة سألتني عن المرتب اللي أنا عايزه... أقول كام؟

فيه قاعدة بسيطة بتقول إن أول واحد يقدم عرض هو الخسران. القاعدة دي هنا صحيحة بنسبة كبيرة. ممكن تقولهم راتب كويس من وجهة نظرك ويكون أقل بكتير من اللي كانت الشركة مستعدة تدفعه، أو تقول مبلغ أكبر بكتير فيبقوا أقل حماسا للتفاوض.

حتى لو عندك فكرة مبدئية عن المرتب الكويس بالنسبالك باستخدام القياسات اللي قلناها قبل كده، من الأفضل أنك متقولهوش في الأول. وزي ما بنقول "ارمي الكورة في ملعب الشركة" أنها تقدم عرضها الأول، وبعدين تبتدي التفاوض منه. ممكن تعكس السؤال بمبرر إن معندكش خبرة عن تكاليف المعيشة أو نظام الضرائب في البلد، وأن الشركة غالبا عندها ميزانية معينة مخصصة للوظيفة دي بأي حال، فانت حابب تسمع عرضهم الأول.

هل أقبل بالراتب المعروض على طول؟ إمتى وازاي أتفاوض وأطلب زيادة؟

لو الراتب المعروض يعتبر متوافق مع تقديرك باستخدام الأساليب اللي قلناها قبل كده، وطبعا بأخذ خبرتك وكفاءتك في الاعتبار، أو لو كنت سعيد الحظ وفاق توقعاتك وتقديرك، ممكن توافق بدون أي مفاوضات.

لو حسيت أن الراتب المعروض أقل من المتوقع بناءا على بحثك، ممكن تتفاوض على الراتب مع الشركة. طريقة التفاوض نفسها تختلف وملهاش قواعد معينة، بس ممكن تاخد بالك من النقط دي:

  • متقولش قيمة راتبك الحالي مهما كانت قيمته ومهما كان السؤال. لو بدأت المفاوضات مع الشركة أن هدفك أنك تشتغل براتب أكبر من راتبك الحالي وخلاص، هيكون مؤشر سلبي عنك لأن ده معناه أن لو شركة تانية عرضت عليك مرتب أعلى بعد كده هتسيبهم وتروح للشركة التانية.

  • دايما تفاوض بشكل ايجابي ومرن، حافظ على تقديرك لذاتك ولخبرتك. الهدف من التفاوض مش مجرد الحصول على أعلى رقم للراتب، لكن الأهم هو أن الطرفين (الشركة وانت) يبقوا عارفين أنهم بيحصلوا على مقابل ممتاز نظير اللي هيقدموه في العلاقة دي (حصول الشركة على وقتك وخبرتك ومجهودك، وحصولك على مقابل مادي من الشركة مقابل ده).

  • زي ما لازم يبقى عندك تقدير لذاتك ومتقدمش تنازلات كتير، خليك منطقي في توقعاتك وطلباتك. يعني لو شركة عرضت مبلغ معين مينفعش يبقى ردك هو طلب ضعف المبلغ! أكيد الشركة مش هتقدر تلبي طلبك وهتعتبر ده سوء تقدير منك.

  • تجنب اي تعليقات سلبية أو غير بناءة. مثلا لو الشركة عرضت مبلغ أقل بكتير من اللي تستحقه متردش بتهكم أو استنكار، رد بشكل احترافي بشكرهم على العرض وبين ليه انت شايف أنه مش راتب مناسب وانك تتمنى أنهم يراجعوا العرض وإلا هتبقى مضطر ترفضه.

ايه الدول اللي ممكن ألاقي فيها أحسن مستوى معيشة بالنسبة للدخل؟

فيه مقالة حلوة على ويكيبيديا فيها قوائم للدول مرتبة بكذا طريقة بناءا على مصادر وأبحاث مختلفة بتاخد في الاعتبار الدخل بالنسبة لتكلفة المعيشة. من خبرتنا شايفين أن النتائج بتعكس الواقع بصورة كبيرة. List of countries by average wage

أنا حاليا مرتبي في مصر (س)... أسافر لو المرتب الجديد على الأقل كام؟

سؤال ملهوش إجابة! مرتبك في الدولة الجديدة ملوش أي علاقة بمرتبك الحالي في مصر ومفيش اي قاعدة عامة تقدر توجد علاقة بينهم. ممكن تراجع المقالة تاني وتشوف إذا المرتب في البلد الجديد هيوفرلك حياة مادية أفضل نسبيا من مرتبك الحالي، وتبني قرارك من النقطة دي.

كلمة أخيرة

تحديد الراتب أوالتفاوض عليه مهارة ممكن تقرأ عنها وتتعلم شوية حاجات، لكن مفيش حاجة هتديك خبرة أكتر من التجربة نفسها. متخليش موضوع الراتب أمر مقلق بالنسبة ليك أو عائق لقبول وظيفة خارج مصر، خصوصا لو كانت أول وظيفة!

لو عندك سؤال بخصوص المرتبات خارج مصر ملقتلوش إجابة في المقال أو حابب نتناقش في نقطة معينة، يسعدنا تعليقك في أسفل المقال.


التعليقات

اقرأ أيضاًكل المقالات