be elsewhere.

تواصل معنا

عن الحضانات (رياض الأطفال) خارج مصر

NotTrees  ●  الثلاثاء ١٦ أغسطس ٢٠١٦ ◷ ١١:١٠ م
عن الحضانات (رياض الأطفال) خارج مصر

رعاية الأطفال من أهم المواضيع اللي بتشغل بال أي أسرة بشكل عام، ولكن من الضروري للأسر اللي بتجهز للسفر وعندها أطفال في سن الحضانة أو بتخطط لإنجاب أطفال في المستقبل، أنها تكون عارفة معلومات أساسية عن أهمية ونظم رعاية الأطفال في البلد الجديد.

المقال ده برعاية أصدقاءنا من موقع Hadanty - دليل الحضانات المصرية الموقع الأشمل لمساعدة كل أب وأم فى إيجاد الحضانة المناسبة لطفله من منزله دون عناء.

أهمية ودور الحضانات للطفل والأسرة

بغض النظر عن الفوائد العامة لإرسال طفلك للحضانة، الاهتمام بالرعاية والتعليم المبكر لطفلك خارج مصر مهم بصورة خاصة!

  • مهم جدا للطفل لأن الحضانة بتساعده على اكتساب المهارات اللغوية (خاصة لو لغة البلد تختلف عن لغة البيت). الدراسات أثبتت أن الأطفال في سن الحضانة ممكن يتعلموا لغاية 3 لغات في نفس الوقت بكل سهولة! بالإضافة لاكتساب المهارات الاجتماعية عن طريق التعامل واللعب مع أطفال تانيين من نفس المرحلة العمرية، خاصة لو كان الطفل وحيد والديه، أو الأسرة لسة مكونتش صداقات في البلد الجديد مع أسر عندها أطفال في نفس العمر.

  • كمان مفيد للوالدين خصوصا لو واحد منهم بس اللي بيشتغل. ذهاب الطفل للحضانة بيقلل الضغط النفسي عن الطرف اللي قاعد في البيت والناتج عن الانتقال لبلد ممكن تكون مختلفة بشكل كبير عن مصر، وبيديله وقت إضافي يسمحله بتعلم اللغة أو الدراسة، أو البحث عن عمل.

معلومات عامة عن الحضانات خارج مصر وقواعد الالتحاق

كما هو متوقع، القواعد بتختلف من بلد للتانية، لكن فيه قواعد عامة ممكن نقول أنها بتنطبق في أغلب الدول:

  • الحضانة اختيارية. وإن كانت تعتبر مرحلة من مراحل التعليم الأساسي في الغالب.

  • السن الأدني العام للالتحاق بالحضانة يبدأ من 3 سنوات. مع وجود استثناءات مختلفة تسمح للأطفال الأصغر سنا بالالتحاق بالحضانة، مثلا لو كان أحد الوالدين بحاجة للتفرغ لتعلم اللغة أو العمل، أو أحد الأسباب الأخرى.

  • في الغالب، الحضانات بتكون حكومية، أو مؤسسات خاصة بإشراف حكومي. الحضانات الخاصة موجودة ولكن بصورة أقل.

  • في العواصم أو المدن المزدحمة ممكن يكون فيه قوائم انتظار للحضانات قد تمتد لبضعة شهور. الأولوية بتكون بترتيب وقت تقديم طلب الالتحاق، مع وجود استثناءات ممكن تقلل مدة الانتظار، زي مثلا إلحاق طفل بأخ أو أخت له في نفس الحضانة، وغيرها من القواعد اللي بتختلف من بلد للتاني.

تكلفة الحضانات خارج مصر

زي قواعد الالتحاق بالحضانة، مفيش مبدأ ثابت للمصروفات الشهرية للحضانات في كل الدول، لكن فيه كذا نقطة ممكن نقولها في الموضوع ده:

  • في أغلب الدول، حساب المصروفات بيتحدد حسب عدد الأيام والفترة اللي الطفل بيروح فيها الحضانة.

  • بعض الدول الحضانات فيها مجانية تماما، أغلبها بسعر رمزي، في البعض الأخر التكلفة تختلف حسب دخل الأسرة الشهري. طبعا مع وجود الحضانات الخاصة اللي بتحدد سعرها بشكل حر.

  • ممكن الحضانة تطلب من الوالدين شراء مستلزمات ضرورية شخصية لاستخدام طفلهم، زي فرش سرير النوم، أو ملابس ثقيلة للشتاء أو للأمطار (زي اللي في صورة المقال :) ) ودي تكلفتها بتبقى على الوالدين بصورة أساسية.

دور ونشاطات الحضانات خارج مصر

بشكل عام الحضانات بتركز على تنمية المهارات العقلية والنفسية والحركية للطفل أكثر من تركيزها على العلوم بمعناها التقليدي. كمان الأطفال بيتعلموا الاعتماد على نفسهم (طبعا تحت إشراف كامل لتربويين مؤهلين). الأطفال بيقضوا جزء كبير من وقتهم خارج غرف الحضانة سواءا في ساحة اللعب المفتوحة، أو في رحلات بيتعلموا فيها قواعد عبور الشارع واستخدام المواصلات العامة زي الباص والمترو، أو زيارة الأماكن الطبيعية المفتوحة لبناء صداقة واهتمام بالطبيعة والحيوانات والطيور.

إزاي تجهز طفلك للالتحاق بالحضانة

الأطفال بيحتاجوا وقت عشان يتعودوا على تجربة الحضانة عموما، وخصوصا لو كانت أول مرة وفي بلد جديد! لحسن الحظ كل الحضانات فاهمين النقطة دي كويس ومستعدين ليها وبيساعدوا الطفل والوالدين على اجتياز أي صعوبات في الأيام الأولى. مثلا بيطلب من الوالدين أو واحد منهم على الأقل البقاء مع الطفل خلال الاسبوع الاول يوميا، ويتم تقليل عدد الساعات تدريجيا لحد ما الطفل يتعود على المكان واللغة اللي ممكن تكون مختلفة. كمان قوانين العمل في بلاد كتير بتسمح بإجازات خاصة مدفوعة الأجر للوالدين للذهاب مع أطفالهم للحضانة في الفترة الأولى.

لو عايز تعرف معلومات أكتر تساعد طفلك على التأقلم في الحضانة الجديدة، موقع Hadanty بيقدم مقالات مفيدة في الموضوع ده.

معلومات متخصصة عن الحضانات في أشهر وجهات السفر والهجرة

ممكن تزور قسم المصادر في موقعنا وهتلاقي معلومات متخصصة أكتر عن رعاية الأطفال في أشهر وجهات السفر والهجرة مقدمة من مصادرها الرسمية.

لو عندك سؤال أو معلومة حابب تضيفها ممكن تكتبها في تعليق في الأسفل وهنكون سعداء بالإجابة أو المناقشة.


التعليقات

اقرأ أيضاًكل المقالات